सुनसरी/ सुनसरीको इटहरी १६ मा शनिबार देखि भाटभटेनी सुपर स्टोर सञ्चालनमा आएको छ । इटहरी १६ लबिपुरमा भाटभटेनीका सञ्चालक मीनबहादुर गुरुङले स्टोरको औपचारिक रुपमा उद्घाटन गर्नुभएको हो । 
उद्घाटनका अवसरमा भाटभटेनीले अल्कोहल र निकोटिन समुहका बाहेक सबै मालसामानमा १० प्रतिशत छुट दिएको र इलेक्ट्रोनिक आइटममा २० प्रतिशतसम्म छुट दिने जनाईएको छ । 
डेढ बिगाहा जमिनसहित इटहरीको भाटभटेनीमा ३अरव रुपैया लगानी रहेको र मनोरञ्जन स्थलसहितको किनमेलको केन्द्र बनाइएको छ । जहाँ अत्याधुनिक सिनेमा हल, बालबालिकाका लागि प्ले ग्राउण्ड, फाउण्डेन, केएफसी, हिमालयन जाभा लगायत काठमाडौंको आँगन रेष्टुरेन्ट समेत रहेको छ । 
उद्घाटनका अवसरमा इटहरीको भाटभटेनीमा उपभोक्ताको भीड लागेको छ । इटहरीलगायत पूर्वका धेरैजसो ठाउँका उपभोक्ता भाटभटेनी पुगेका छन् । 
उद्घाटनपछि सञ्चालक मीनबहादुर गुरुङले भाटभटेनी सुपर मार्केटले गुणस्तरीयतामा बिशेष ध्यान दिएको बताउँदै उपभोक्ताको स्वास्थ्य प्रति कम्पनी सदैव सचेत रहने बताउनुभएको छ । पूर्वी नेपालको बजारलाई लक्षित गर्दै इटहरीमा नेपालकै ठूलो भाटभटेनी सुपर मार्केट निर्माण गरिएको गुरुङको भनाई छ। 
सामान्य कोल्ड स्टोरबाट शुरु भएको भाटभटेनीलाई सुपरमार्केटमा परिवर्तन गरेर देशब्यापी बनाएसँगै आम उपभोक्ताले एकै छानामुनी १५ हजार बढी सामानहरु छानीछानी खरिद गर्ने अवसर मिलेको गुरुङ्गको भनाई छ । मीनबहादुर गुरुङले बैंकको जागिर छाडेर साढे तीन दशक अगाडी सामान्य कोल्ड स्टोरबाट काठमाडौंको नक्सालमा भाटभटेनीको शुरुवात गर्नुभएको थियो ।
