इटहरी/ सुनसरीको इटहरीस्थित बेदान्त हस्पिटलले कोरोना संक्रमितको घर–घरमा गएर स्वास्थ्य परामर्श दिन थालेको छ। युवासंघ इटहरी ५ वडा कमिटिको समन्वयमा हस्पिटलले संक्रमितको घरमै गएर औषधीसहित परामर्श शुरु गरेको हो। 
हस्पिटलका प्रबन्ध निर्देशक इन्द्र श्रेष्ठका अनुसार डा.बिपिन बस्नेत, हेल्थ असिस्टेन्ट रञ्जन धिताललगायतले कोरोना संक्रमितको घरमै गएर औषधीसहित परामर्श दिन शुरु गरेको हो। 
पहिलो चरणमा इटहरी ५का संक्रमितहरुलाई हस्पिटलले परामर्श दिएको श्रेष्ठले बताउनुभयो। घरमै डाक्टर गएर परामर्श दिँदा कोरोना जित्न हौसला मिलेको संक्रमितहरुले बताएका छन्।
राष्ट्रिय युवासंघका इटहरी ५का संयोजक केशव न्यौपाने र युवा संघका सुनसरी क्षेत्र नम्बर २ का संयोजक निशान बुढाथोकीले संक्रमितको घरमा पुग्न र औषधोपचारका निम्ति आवश्यक सहयोग गर्नुभएको छ। 
केही दिनयता वडा ५ मा पनि कोरोना संक्रमित बढेकाले वडा कार्यालयले सो क्षेत्र सिल गरेको छ। त्यसैले सचेतना अभियान समेत सञ्चालन गरिएको न्यौपानेले बताउनुभयो। 
त्यस्तै, हस्पिटलले इटहरीका सबै वडाका सम्पर्कमा आएका र मोरङको सुन्दरहरैँचाका गरि हालसम्म एक सय बढीलाई टेलिमेडिसनद्वारा निःशुल्क परामर्श गरि औषधी दिदैँ आएको छ। टेलिमेडिसिन सेवामा डा.आदर्श झाले समन्वय गरिरहेको हस्पिटलले जनाएको छ।
